Finalja e Botërorit të Klubeve përfundoi me përplasje të ashpra mes Chelsea dhe Paris Saint-Germain, pas fitores 3-0 të londinezëve. Ndeshja u shoqërua me tensione pas vërshëllimës përfundimtare, ku trajneri i PSG-së, Luis Enrique, u përfshi në një incident fizik me sulmuesin e ri të Chelseat, Joao Pedro.
Pamjet tregojnë Enriquen duke tentuar të përmbahet nga stafi i tij, ndërsa më pas godet dy herë në fytyrë Pedro-n, i cili përfundon në tokë. Edhe portieri Gianluigi Donnarumma u përfshi, duke u përballur agresivisht me lojtarët e Chelseat.
Megjithatë, pas ndeshjes, Enrique mohoi se kishte qëllim të godiste ndokënd. Ai deklaroi:
“Në fund të ndeshjes ndodhi një situatë që ishte krejtësisht e shmangshme nga të gjithë. Qëllimi im ishte të ndaja lojtarët, për të shmangur përshkallëzimin. Kishte shumë tension dhe shumë presion, ndaj pati shtyrje nga shumë njerëz. Këto janë situata që s’duhet të ndodhin më.”
Tensionet shpërthyen kur Achraf Hakimi iu drejtua me gjeste provokuese Pedro-s dhe Andrey Santos, duke sinjalizuar se “flasin shumë”. Situata doli jashtë kontrollit teksa lojtarët e të dyja skuadrave u përfshinë në debate dhe përplasje fizike në fushë.
Chelsea kishte dominuar ndeshjen, me dy gola nga Cole Palmer dhe një tjetër nga Pedro, duke siguruar trofeun e dytë sezonal pas fitores në Conference League.
“Është ndjesi e jashtëzakonshme,” – tha Palmer pas ndeshjes. “Të gjithë na nënvlerësuan, por treguam se jemi në rrugën e duhur. Trajneri po ndërton diçka speciale.”
/vizionplus.tv
