Bosi i mafies italiane Matteo Messina Denaro ndërroi jetë në moshën 61-vjeçare. Ai u arrestua në janar të këtij viti, pasi kaloi 30 vjet në arrati. Denaro vuante nga kanceri në kohën kur u arrestua nga uniformat blu. Gjendja e tij shëndetësore u përkeqësua në javët e fundit dhe ai u dërgua në një spital nga burgu i sigurisë së lartë në Italinë qendrore.
Mjekët u detyruan te ndalonin së ushqyeri Denaron, pasi ai ra në koma. Messina Denaro ishte dënuar për krime të shumta, përfshirë për rolin në planifikimin e vrasjeve të prokurorëve anti-mafia, Giovanni Falcone dhe Paolo Borsellino në vitin 1992. Ai ishte përgjegjës edhe për sulmet me bombë në Romë, Firencë dhe Milano më 1993, ku si pasojë vdiqën 10 persona,dhe po ashtu për organizimin e rrëmbimit dhe vrasjes së djaloshit 12-vjeçar Giuseppe Di Matteo, në përpjekje për ta bindur babanë e tij të mos dëshmonte në gjyq kundër mafies. Ai u mbajt peng për dy vjet dhe më pas u vra.
I biri i një mafiozi, Messina Denaro u lind në qytetin jugperëndimor të Sicilisë, Castelvetrano në vitin 1962. Njësoj si babai i tij ai iu bashkua mafies herët dhe në moshën 18-vjeçare kreu vrasjen e parë. Denaro deklaroi më parë se kishte vrarë aq shumë njerëz, mjaftueshëm sa për ta mbushur një varrezë.
