‘Situata mes Kosovës dhe Serbisë dhe tensionet në veri kanë potencial të kthehen në konflikt rajonal’.
Kështu ka deklaruar sot i dërguari i SHBA për Ballkanin Perëndimor, Gabriel Escobar në një intervistë në Këshillin Atlantik së bashku me të dërguarin e BE, Miroslav Lajcak i cili gjithashtu shprehu shqetësimin e tij.
GABRIEL ESCOBAR
EMISAR I SHBA
“Jam shumë i shqetësuar, kjo situatë ka potencialin të shndërrohet në një konflikt dhe konfrontim rajonal dhe kjo është arsyeja përse ne po i mbështesim kaq fort përpjekjet evropiane. Kjo duhet të jetë përpjekje evropiane sepse të dy vendet janë në Evropë, aspirata më e lartë e tyre është integrimi në Bashkimin Evropian. Gjithashtu si mbështetësit më të mëdhenj të Kosovës, do të donim ta shihnim atë pjesë të NATO-s dhe Bashkimit Evropian, kështu që ne duam një proces që ulë shqetësimet e pesë vendeve mosnjohëse dhe ky duhet të jetë proces evropian, por kjo nuk do të thotë se ne qëndrojmë pasiv”
Gjatë intervistës, Escobar theksoi rëndësnë e rikthimit në dialog ndërsa përsëriti qëndrimin e SHBA për çështjen e tre policëve kosovarë të rrëmbyer nga forcat serbe.
“Do të donim që ata të liroheshin menjëherë. Qëndrimi ynë është se edhe nëse janë rrëmbyer ose kanë hyrë gabimisht në territorin serb, ata nuk kanë pasur për qëllim të ishin brenda territorit serb. Prandaj, ata duhet t’u kthehen familjeve të tyre menjëherë”
Ndërkohë, edhe Lajçak tha se prioriteti i parë është shtensionimi i situatës.
MIROSLAV LAJCAK
EMISAR I BE
“Situata është shumë e vështirë. Jam shumë i shqetësuar, nuk e fsheh dot këtë. Që nga 26 maji ka njerëz në rrugë, aty është Policia e Kosovës, KFOR-i dhe kemi parë edhe disa incidente. Unë vlerësoj se prioriteti i parë është shtensionimi, të largojmë njerëzit nga rruga dhe të rikthehemi në dialog. Si pjesë e procesit të normalizimit është që të kemi zgjedhje të reja, me pjesëmarrjen e serbëve të Kosovës pa parakushte. Nëse nuk arrijmë ta shtensionojmë situatën, atëherë ne po presim që të kemi viktima”.
Të njëjtat thirrje për të dyja palët i përsëriti më herët edhe Presidentja e parlamentit Europian.
