Meteorlogu Hakil Osmani ka bërë me dije si do të jetë moti këtë fundjavë dhe fillimin e javës që vjen.
Në një lidhje “Skype” me emisionin “7pa5” në Vizion Plus, Osmani tha se gjatë fundjavës pritet të ketë rritje të temperaturave dhe interval të gjata me diell.
“Dita e sotme ka sjell përmirësim të dukshëm të kushteve të motit, duke bërë që të kemi interval të gjata me kthjellime dhe herë pas here kalime të lehta të vranësirave. Pjesa më e madhe e vendit do të jetë në mbizotërimin e motit të qëndrueshëm.
Kemi rritje të temperaturave të ajrit që në orët e para të mëngjesit, duke bërë që vlerat minimale të jenë 10 gradë Celsius, ndërsa maksimumet 29 gradë Celsius.
Vija bregdetare pritet t’i ketë maksimumet nga vlera 16 deri në 29 gradë Celsius.
Do të jetë një fundjavë shumë e mirë. Do të kemi temperatura të larta, të cilat ditën e shtunë regjistrohen në vlerën 31 gradë Celsius. E diela do të jetë në mbizotërimin e kthjellimeve, intervaleve të gjatë me diell. Do të vijojë rritja e temperaturave të ajrit me maksimume që ngjiten në vlerën 33 gradë Celsius.
Dita e hënë dhe dita e martë ka sinjale që pjesa më e madhe e territorit shqiptar të jetë në mbizotërimin e motit të qëndrueshëm. Dita e martë pritet që vranësirat gjatë pasdites t’i ketë më të shpeshta. Temperaturat do të vijojnë të jenë të larta. Maksimumet pritet të qëndrojnë në vlerën 32 gradë Celsius”, tha ai. /vizionplus.tv
