Deputeti demokrat, Asllan Dogjani, i ftuar në Quo Vadis të moderatores Pranvera Borakaj, ka komentuar vendimin e Gjykatës Kushtetuese për lënien në detyrë si kryetar i Bashkisë së Tiranës, Erion Veliajn.
Sipas Dogjanit, vendimi ishte i drejtë, megjithatë Veliaj duhet të ishte shkarkuar kohë më parë për shkelje të rënda kushtetuese.
Pjesë nga biseda:
Borakaj: Pas vendimit të GJK, kishit dilema?
Dogjani: Unë jam jurist dhe vij nga fusha e avokatisë, por edhe nga Policia e Shtetit. Por dua të them se unë e prisja një vendim të tillë, pasi Kushtetuta është e qartë, pasi i përket shkarkimit të një kryetari bashkie të zgjedhur nga votat. Vendimi i këshillit bashkiak që propozoi shkarkimin e kryetarit të bashkisë ishte abuzuar në nenin 72, ndërkohë Kushtetuta është e qartë në nenin 115, ku thotë se kryetari i bashkisë shkarkohet vetëm për shkelje të rëndë kushtetuese.
A duhej shkarkuar Erion Veliaj? Sigurisht që duhej shkarkuar. A ka bërë shkelje kushtetuese? Sigurisht që ka bërë. Përfitimet personale për shkak të detyrës. Sot Veliaj është i akuzuar për pastrim parash, korrupsion, që do të thotë që ka bërë shkelje të Kushtetutës. Sigurisht që ai është i dyshuar. Ne sot kemi një të vrarë, Ardit Gjoklajn, u vra duke punuar. A ka bërë shkelje Veliaj? Sigurisht që ka bërë. Brenda natës janë bërë ndryshime të lejeve në ndërtime, ju janë mbyllur dritaret qytetarëve. Sa herë ka përdorur Policinë Bashkiake në kundërshtim me ligjin.
Ajo që vërej unë nuk është se juristët e Ramës nuk e dinin se Veliaj nuk ka shkuar në punë pasi ishte në burg. Këta e çuan se kujtuan se vetë Veliaj do të ndjente presionin dhe do të tërhiqej.
Borakaj: Nuk e hëngri presionin…
Dogjani: Jo, nuk e hëngri, por unë nuk besoj se Veliaj ka guximin t’i marrë me radhë. Kush mendon sot se Veliaj ka bërë gjithë këto zullume pa dijeninë e Edi Ramës? Tjetër shkelje e madhe e Kushtetutës është rrethrrotullimi i sheshit “Shqiponja”.
