Kryebashkiaku i Tiranës Erion Veliaj, ishte i ftuar këtë të premte në ‘Zgjedhje 2021’ nga Alban Dudushi dhe Pranvera Borakaj, në Vizion Plus prej ku ndër të tjera sqaroi edhe çështjen e projektit për Teatrin e ri që do të ndërtohet.
“Do të kushtojë rreth 30 mln euro, të cilat ne i kemi marrë si kredi me fondin e Abu Dabit. Vetëm parkingu nëntokësor, 2 kate, ku nuk do vihet më me djersë e me erë nga sakrifica për të parkuar diku e për t’ja lënë njërit, por do shkosh si zonjë apo zotni poshtë… vetëm parkingu i cili gjatë ditëve të javës do funksionojë për të gjithë institucionet që kanë nevojë tek pedonalja e Tiranës, përfshirë Bashkinë, Ministrinë e Rendit, të gjithë që janë aty, do paguajë kredinë. Pra, kemi ngritur një sistem, ku ajo do paguajë veten”, deklaroi Veliaj.
Kreu i Bashkisë tha se puna si kryebashkiak e ka bërë që të marrë vendime të vështira, si ajo për Teatrin Kombëtar. Ai shpjegoi se ndjen keqardhje për çdo avlli që i duhet të prishet për të ndërtuar aty projekte të reja.
“Puna ime përfshin vendime shumë të vështira. Në rastin e Teatrit Kombëtar duhej marrë një vendim i vështirë për atë nyje gordiane. Pyet njerëzit që kanë tërë jetën që aktrojnë aty, të cilët thonë se nuk shkohet në një teatër ku vrisje kokën sa herë futeshe në skenë, nuk shkohet në Teatër kur ti ke ende banjo ‘alla frënga’, nuk shkohet në një teatër kur ti ndërrohesh në korridor, dhe nuk shkohet në një teatër kur ti shkon me batanije në dimër dhe me peshqir në verë. Ndjej keqardhje për çdo avlli që prishet në Tiranë, kur bëhet një rrugë e re sepse ai që ka jetuar 30 vite në atë avlli nuk e kupton, sepse thotë e kam hapësirën time intime. Por, ama ti duhet të marrësh një vendim të vështirë, do thuash e kuptoj, të lus për mirëkuptimin, por kjo rrugë do bëhet më e mirë kur të ketë trotuar, parkim, lulishte…”, deklaroi Veliaj.
