“Shqipëria është një pjesë e madhe e projektit evropian”, kështu u shpreh kryetari i Bashkisë së Brukselit, Filip Klose, në një takimin me kryetarin e Bashkisë së Tiranës, Erion Veliaj. Gjatë vizitës në kryeqytetin shqiptar, Klose vlerësoi marrëdhëniet e ngushta mes dy qyteteve dhe theksoi rolin kyç që diaspora shqiptare në Belgjikë luan në forcimin e këtyre marrëdhënieve.
“Ju e dini që Shqipëria, në veçanti Tirana, është në zemrën time. Ne kemi bashkëpunuar për shumë vite së bashku dhe është shumë e rëndësishme sepse para së gjithash, diaspora shqiptare është kaq e madhe në vendin tim. Por, gjithashtu është e rëndësishme për mua të ndaj se, si kryeqytet i Bashkimit Evropian, unë dua gjithmonë të dëshmoj se Shqipëria është një pjesë e madhe e projektit evropian”, u shpreh ai.
Nga ana e tij, Veliaj e cilësoi kryebashkiakun Klose si një mik të çmuar të Shqipërisë, duke e falënderuar për mbështetjen.
“Ju jam shumë mirënjohës për miqësinë! Pas tërmetit, ju ishit i pari që erdhët këtu për të vizituar disa nga familjet e prekura. Kur ditët janë me diell, edhe punët shkëlqejnë, të gjithë janë shok e miq, por kur ditët janë të vështira dhe kur janë ato ngrysjet e situatave sfiduese, aty duken shokët e vërtetë. Je një shok, një mik i vërtetë, jo vetëm i imi, por i të gjithë shqiptarëve”, tha Veliaj.
Në shenjë mirënjohjeje, kryebashkiaku i Tiranës i dhuroi homologut te tij një jelek tradicional shqiptar. Vizita e kryebashkiakut të Brukselit në Tiranë u zhvillua në kuadër të “Paktit të Qyteteve të Lira”. /vizionplus.tv
