Masat ndaluese për disa zyrtarë të lartë të Bashkisë së Tiranës, të akuzuar për shembjen e pallateve në zonën e Kombinatit në kuadër të procesit të rindërtimit, ishin një tjetër temë e komentuar në studion e Quo Vadis të moderatores Pranvera Borakaj në Vizion Plus.
Të ftuar në studio, avokatët Leonard Karaj dhe Kujtim Ibraj kanë komentuar skandalin me procesin e rindërtimit.
Avokati Ibraj tha se në Bashkinë e Tiranës ka drejtorë milionerë, që janë pasuruar nga ky proces. Sipas tij, e vetmja e drejtë e Ramës është që i largoi drejtorët nga puna, madje duhet t’i kishte shkarkuar të gjithë drejtorët.
Ndërsa për avokatin Leonard Karaj, çështja e rindërtimit do ta lërë në burg Erion Veliajn, duke theksuar se “5 Maji” do të dalë shumë shpejt dhe SPAK do të kërkojë të tjera masa.
“Erion Veliaj nuk del dot nga burgu. Sa të bëhet gati të dali, do t’i dalë një çështje tjetër. Tani është çështja e 5 Majit. Në dijeninë time është dhe Arbjan Mazniku. Shumë shpejt SPAK do të dalë me një kërkesë. Di të them se 5 Maji është në përfundim e sipër”, tha Karaj.
