Gjatë fjalës së tij në mbledhjen e radhës stë Këshillit Bashkiak, duke folur për skemën e re sociale për pajisjen me abone falas të të gjithë gjyshërve dhe gjysheve të Tiranës, kryebashkiaku Erion Veliaj tha se deri më tani rreth 30 mijë pensionistë kanë përfituar abonenë falas.
Veiaj dha lajmin e mirë se shumë shpejt pensionistët do të pajisen me Kartën e Pensionistit, e ngjashme me kartën e studentit, e cila ofron shumë shërbime të tjera në qytet, me çmime të reduktuara.
“Historia e abonesë për pensionistët pati një interes të jashtëzakonshëm. Pasi bëra konsultën e parë me përfaqësues të shoqatave të pensionistëve, të të gjithë njësive, një nga propozimet ishte: Pse nuk bëjmë një kartë të pensionistit, ashtu siç kemi kartën e studentit? Studenti nuk merr vetëm abonenë dhe gjysmën e konviktit, por edhe ulje në çmime në shumë prej dyqaneve, minimarketeve, supermarkete, kinkaleri etj. Besoj që për gjyshërit tanë çdo kursim në çdo shërbim apo në çdo shpenzim është diçka e dobishme“, tha Veliaj.
Ai u bëri apel pensionistëve që të mos krijojnë radhë, pasi ka abone për të gjithë.
“Po të kalosh tani është bosh kioska e aboneve. Nuk ka nevojë të shkojnë të gjithë në 07.00 të mëngjesit. Duhet edhe pak sensibilizim, për sa kohë që është e hapur gjatë gjithë ditës. Kemi abone për të gjithë, nuk ka një limit. Vetëm në muajin e parë jemi mbi 30 mijë. Do vijojmë të shohim kuotat dhe do jemi të gatshëm për t’u përgjigjur edhe me kartën e pensionistit. Besoj që ky është një super lajm për gjyshet e gjyshërit tanë”, tha Veliaj.
