Zjarret shkatërruese që kanë përfshirë Kaliforninë Jugore që prej 7 ditësh tashmë, janë përhapur në mënyrë të konsiderueshme duke djegur një sipërfaqe më të madhe se qyteti i Nju Jorkut dhe Bostonit bashkë.
Furia e flakëve e quajtur “Thomas” ka djegur më shumë se 200 mijë hektarë tokë gjatë ditëve të fundit. I fuqizuar nga erërat e forta, ai u bë zjarri i pestë më i madh në historinë e shtetit.
212 mijë njerëz janë evakuuar nga banesat e tyre dhe qindra godina janë shkatërruar që prej 4 dhjetorit ndërsa zjarrfikësit po luftojnë me flakët për të vendosur nën kontroll vatrat aktive.
Erërat e nxehta dhe kushtet e thata po ndihmojnë përhapjen e zjarreve ndërsa nuk parashikohen reshje shiu për të paktën 10 ditë.
Një grua raportohet se ka humbur jetën ndërsa dhjetëra të tjerë janë lënduar gjatë evakuimit.