Vasili: Gjonaj zero rol në reformën në drejtësi, ambasadorët të lexojnë ligjet!
Me një gjuhë të ashpër, nënkryetari i LSI, Petrit Vasili akuzoi ministren e Drejtësisë, Etilda Gjonaj se është thjesht një falsifikatore e reformës në drejtësi. Ai tha në “Facebook” se ajo nuk ka asnjë rol vendimtar në këtë reformë. Për këtë, u bëri thirrje edhe ambasadorëve që të lexojnë ligjet dhe të jenë edhe më të qartë.
“Etilda zero rol në reformën në drejtësi, por rol kryesor si falsifikatore! Etilda, pra Ministria e Drejtësisë, ka zero rol në reformën në drejtësi. Zero është roli i Ministrisë së Drejtësisë dhe ky zero rol është përcaktuar qartë në të gjitha ligjet e reformës në drejtësi. Këto ligje të cilët janë të shkruar në shqip dhe anglisht… mund t’i lexojnë pa problem edhe shqiptarët, edhe ndërkombëtarët, bile edhe ambasadorët…!! Komisioni i Venecias ka qenë asgjësues në opinionin e tij për reformën në drejtësi dhe kërkonte prerë që Ministria e Drejtësisë të mos kishte asnjë karrige në qeverisjen e gjyqësorit dhe në asnjë nga institucionet e reja të gjyqësorit.”
Sipas Vasilit, çdo mbështetje për Etilda Gjonajn, është thjesht një “dorë” që jepet për të asgjësuar reformën në drejtësi. Një reagim i tillë i zyrtarit të LSI erdhi pas takimit të Gjonajt me ambasadoren Yuri Kim. Diplomatja amerikane i kërkoi ministres që të vijojë me të njëjtin kurs për reformën në drejtësi, në një kohë kur akuzat ndaj saj nga presidenti Ilir Meta s’kanë qenë të pakta.
