Ursula von der Leyen mori këtë të mërkurë, miratimin final të parlamentit të Strasburgut për një mandat të dytë 5 vjeçar në krye ekzekutivit europian i cili do të nise në dhjetor.
Komisioni i propozuar mori 370 vota pro, 282 kundër dhe 36 abstenime nga ligjvënësit në Strasburg, mjaftueshëm për të kaluar.
Në fjalimin hyrës, Von der Leyen premtoi një komision të fokusuar drejtpërsëdrejti në ringjalljen e ekonomisë rritjen e konkurrencës, shkurtimin e burokracisë, zhbllokimin e investimeve dhe mbylljen e hendekut të inovacionit me Shtetet e Bashkuara dhe Kinën.
Mbështetja për Ukrainën, mbrojtja, menaxhimi i migracionit, zgjerimi, dhe sundimi i ligjit do të jenë gjithashtu ndër prioritetet kryesore të ekipit të saj.
“Lufta jonë për liri mund të duket ndryshe nga brezat e kaluar. Por veprimet janë po aq të larta. Këto liri nuk do të vijnë pa pagesë. Do të thotë të bëjmë zgjedhje të vështira. Do të thotë investim masiv në sigurinë dhe prosperitetin tonë. Dhe mbi të gjitha, do të thotë të qëndrojmë të bashkuar dhe besnikë ndaj vlerave tona, tha Ursula Von Der Leyen.
Ursula Von Der Leyen në fjalimin e saj tha se vendet kandidate, si ato nga Ballkani Perëndimor, ashtu edhe Ukraina, Moldavia dhe Gjeorgjia e kanë vendin në BE duke theksuar se procesi i zgjerimit do të vazhdojë duke respektuar parimin e meritave individuale.
Me rajonin e Ballkanit Perëndimor në pesë vitet e ardhshme pritet që më së shumti të merret komisionerja e ardhshme për zgjerim, Marta Kos, nga Sllovenia, dhe përfaqësuesja e lartë për politikë të jashtme dhe siguri, Kaja Kallas. Që të dyja, gjatë seancave dëgjimore, kanë premtuar se do të angazhohen që në pesë vjetët e ardhshëm zgjerimi i Bashkimit Evropian të bëhet realitet./vizionplus.tv
