Banorët e Astirit në ditën e 22 të protestës së tyre këtë të dielë janë zhvendosur pranë Gjykatës së Krimeve të Rënda, ku po zhvillohet seanca për dhënien e masave të sigurisë.
Protestuesit kërkojnë nga gjykata lirimin e tyre. Sipas informacioneve në seancë ndodhen deputetë të opozitës të cilët mbështesin protestuesit që dhunuan policinë pak ditë më parë në protestën para Parlamentit. Nga deputetet e LSI, të pranishëm në sallë janë deputetët Endrit Braimllari, Silva Caka, Klajda Gjosha dhe Kejdi Mehmetaj.
Kjo seancë vjen pas protestës së dhunshme para Parlamentit, e cila degradoi në dhunë fizike mes qytetarëve dhe policisë.
Prokuroria ka kërkuar arrestim më burg për protestuesit; Fluturim Goleci, Ruzhdi Daci, Marsel Velillari, Dorjan Protoduari, Amarildo Sinanaj dhe Shpati Bilbilaj.
Ndërkohë në protestën e zhvilluar të enjten e javës së kaluar para Kuvendit, u plagosën 15 efektivë, mes tyre efektivja Ina Nuka, e cila humbi 2 gishta, ndërsa u shoqëruan 25 persona, nga të cilët 11 u mbajtën në burg dhe sot për 7 prej tyre prokuroria do të kërkojë masën ‘arrest me burg’ dhe për 4 të tjerë detyrim paraqitje.
