Sekretari i përgjithshëm i PD-së, Gazment Bardhi e konsideron një eksperiment shumë të rrezikshëm për shqiptarët propozimin e deputetit Ilir Beqaj për uljen e pagave në sektorin publik dhe privat.
Në një postim në “Facebook”, Bardhi shkruan se ditën kur propozon uljen e pagave të mijëra njerëzve, kryeministri Edi Rama “ka paguar për PPP mafioze të inceneratorit të Tiranës 650 mijë euro”.
Sipas tij, qeveria ka akoma të paktën 220 milionë euro të paprekura nga koncesionet që ai i quan korruptive.
“Edi Rama ka nisur një eksperiment të ri dhe shumë të rrezikshëm me shqiptarët. Përmes Ilir Beqajt, një nga ministrat e tij më të diskretituar si të korruptuar, Edi Rama propozon uljen e pagave në sektorin publik e privat, si mënyrë për të furnizuar qeverinë me parà. Një propozim kriminal dhe i papranueshëm për çdo qeveri, që vendos të parin interesin e qytetarit. Ditën kur propozon uljen e pagave të qindra mijëra njerëzve, Edi Rama ka paguar për PPP mafioze të inceneratorit të Tiranës 650 mijë euro. Po të mos kishte hallin e biznesit të vet me mafian e plehrave, me kaq parà, Edi Rama mund të kishte siguruar pagën e 3125 njerëzve të mbetur pa punë.”
Për demokratin, kryeministri Rama po e përdor Beqajn për të testuar qytetarët, ndërsa e cilëson një tjetër projekt që ka për qëllim vazhdimin e grabitjes në kohë pandemie.
“Qeveria ka parà, por Edi Rama nuk heq dorë nga pagesat për aferat e pista, duke paguar klientët e tij me paratë e shqiptarëve. Vetëm për kompanitë e Ministrit më të keq të Shëndetësisë në të gjitha kohërat, Edi Rama ka paguar 40 milionë euro në 6 vjet. Prandaj, e përdor tani Ilir Beqajn për të testuar qytetarët deri ku mbajnë. Ky është një nga qëllimet pse ai zgjati pa asnjë kuptim gjendjes e fatkeqesisë natyrore. Kërkon të mbajë me në këmbë qeverinë e tij të falimentuar duke vjedhur edhe djersën e ndershme të shqiptarëve. Ky është një tjetër projekt për të vazhdura grabitjen në kohë pandemie dhe për të fshehur dështimin e tij!”
