Forcat ukrainase pretendojnë se kanë shkatërruar një anije raketore ruse nga Flota e Detit të Zi në një operacion special në Krimenë e pushtuar nga Rusia.
Ivanovets, një anije e vogël luftarake, u godit gjatë natës, tha inteligjenca ushtarake.
Po ashtu, inteligjenca ushtarake ukrainase ka publikuar pamjet që pretendohet se tregojnë momentin e goditjes që pasohet nga një shpërthim i madh.
Nga ana tjetër, autoritetet ruse nuk kanë reaguar lidhur me këtë ngjarje.
Megjithatë, blogeri ushtarak rus “Voenkor Kotenok” shkroi në Telegram se anija ishte fundosur pasi u godit tre herë nga dronët detarë.
Disa veçori të dukshme në anije në videon ukrainase përputhen me ato të Tarantul, ose Projekti 12411, një klasë anijesh raketash të operuara nga marina ruse dhe të tjera, të cilës i përket Ivanovets.
Këto veçori përfshijnë paraqitjen e direkut dhe sensorëve në majë të superstrukturës kryesore, si dhe një kube të madhe radari në majë të urës.
Drejtoria kryesore e Inteligjencës së Ukrainës tha se anija u shkatërrua nga ushtarët e njësisë së saj speciale “Grupi 13” në liqenin Donuzlav, një gji me ujë të kripur në anën perëndimore të gadishullit të Krimesë, i cili strehon një bazë detare.
Anija kishte një vlerë prej 60-70 milion dollarë.
Ukraina ka arritur një sërë suksesesh në luftën në dhe rreth Detit të Zi, duke dëmtuar ose shkatërruar anijet luftarake ruse pavarësisht se nuk ka flotë të sajën.
Në dhjetor, Kievi tha se kishte shkatërruar anijen e madhe ulëse Novocherkassk në Feodosia, Krime. Rusia konfirmoi se anija ishte dëmtuar.
Ndërkohë, në prill 2022, disa muaj pas pushtimit rus të Ukrainës, Moskva, flamuri i Flotës ruse të Detit të Zi, u dëmtua dhe u fundos përfundimisht, me gjasë nga raketat ukrainase .
Pas një sulmi me raketa në selinë e flotës së Detit të Zi në Sevastopol shtatorin e kaluar, imazhet satelitore treguan se marina ruse kishte zhvendosur pjesën më të madhe të flotës së saj të Detit të Zi larg nga Krimea në portin rus të Detit të Zi të Novorossiysk./vizionplus.tv/
