Edison Memolla, kryebashkiaku i dënuar i Rrogozhinës, nuk dorëhiqet nga posti.
Përmes një deklarate në facebook, ai qartësoi se do të respektojë zgjedhësit e tij, deri në një vendim të formës së prerë.
“drejtësinë e re e kam mbështetur fuqimisht dhe si rrjedhojë jam i hapur të pranoj çfarëdolloj vendimi të dhënë kundrejt meje, por kjo nuk më pengon të apeloj një vendim i cili nuk është i mbështetur aspak në prova dhe fakte. Theksoj se deri në një vendim të formës së prerë e më tej, unë jam kryetar i bashkisë Rrogozhinë, në krye të detyrës dhe i vetëdijshëm për të gjitha përgjegjësitë që ky post sjell,” shkruan Edison Memolla.
Kryetari i bashkisë Rrogozhinë, që doli nga zgjedhjet e pjesshme të 6 marsit të tre viteve më parë, u dënua nga Gjykata e Posaçme për korrupsion zgjedhor me 1 vit burg.
Akuza e SPAK u bazua në një audiopërgjim që doli në media, ku ai i kërkonte një elektricisti që të mos i ndërpritej energjia, një debitoreje. Përgjimi u publikua vetëm 48 orë përpara se ai të zgjidhej kryetar bashkie.
