Presidenti i SHBA-së, Donald Trump, deklaroi se Irani është afër një marrëveshjeje me Shtetet e Bashkuara lidhur me konfliktin dhe tensionet mes dy vendeve, ndërsa edhe Teherani ka sinjalizuar progres në negociatat e javës së fundit.
Në një intervistë për CBS News, Trump tha se ka parë një draft-marrëveshje me Iranin, por shmangu detaje të mëtejshme.
“Nuk e di ende nëse është mjaftueshëm e mirë. Do të firmos vetëm një marrëveshje ku marrim gjithçka që duam”, deklaroi ai, duke shtuar se çdo marrëveshje duhet të garantojë që Irani të mos sigurojë armë bërthamore.
Nga ana tjetër, zëdhënësi i Ministrisë së Jashtme iraniane paralajmëroi se ende nuk ka dakordësi për çështjet kryesore.
Sipas tij, Irani po punon mbi një memorandum mirëkuptimi me 14 pika, i cili pritet të finalizohet për të hapur rrugën e negociatave të mëtejshme brenda 30 deri në 60 ditëve.
Ndërkohë, Sekretari amerikan i Shtetit, Marco Rubio, gjatë një vizite në Indi, u shpreh me optimizëm për negociatat dhe përsëriti qëndrimin e SHBA-së se Irani nuk duhet të zotërojë armë bërthamore.
Edhe presidenti francez, Emmanuel Macron, zhvilloi bisedime me Trump dhe liderët e vendeve të Gjirit lidhur me negociatat me Iranin, ndërsa Franca po kërkon një zgjidhje diplomatike dhe rihapjen e plotë të ngushticës së Hormuzit.
Tensionet mbeten të larta edhe në terren. SHBA-ja vijon bllokadën ndaj porteve iraniane që prej 13 prillit, ndërsa Komanda Qendrore Amerikane deklaroi se ka devijuar mbi 100 anije dhe ka lejuar kalimin e 26 mjeteve humanitare.
Nga ana tjetër, Irani pretendon kontroll ushtarak mbi zonën përreth Ngushticës së Hormuzit dhe ka deklaruar se çdo kalim kërkon koordinim.
