Uashingtoni po rrit praninë e tij ushtarake në Izrael, duke dërguar dhjetëra avionë cisternë, të cilët shërbejnë për furnizimin me karburant të avionëve ushtarakë në ajër.
Lajmi është bërë i ditur nga Axios, duke cituar tre zyrtarë amerikanë dhe izraelitë.
Sipas raportit, ky zhvillim vjen në një kohë kur presidenti amerikan Donald Trump po shqyrton plane të reja ushtarake që parashikojnë zgjerimin e operacioneve kundër Iranit, përtej veprimeve që po zhvillohen aktualisht në rajonin e Ngushticës së Hormuzit.
Mes opsioneve që po diskutohen janë sulme ndaj infrastrukturës strategjike iraniane, përfshirë centrale elektrike, goditje të reja ndaj objekteve bërthamore për të shkatërruar rezervat e uraniumit të pasuruar, si dhe bombardimi i objektit nëntokësor të njohur si Pickaxe Mountain, i cili raportohet se është ende në ndërtim.
Edhe pse Trump nuk ka marrë ende një vendim përfundimtar, burimet amerikane dhe izraelite thonë se ai është i gatshëm të rrisë presionin ndaj Teheranit, me synimin për ta detyruar Iranin të rihapë Ngushticën e Hormuzit dhe të pranojë kërkesat amerikane lidhur me programin e tij bërthamor.
Ndërkohë, kryeministri izraelit Benjamin Netanyahu paralajmëroi Iranin se çdo sulm i drejtpërdrejtë ndaj Izraelit do të përballet me një përgjigje shumë më të ashpër.
“Mos prisni që gjithçka të mbetet e qetë nëse na sulmoni. Përgjigjja nuk do të jetë si më parë, por shumë më e fuqishme”, deklaroi ai.
Sipas Axios, shtimi i avionëve amerikanë në aeroportin Ben Gurion ka shkaktuar edhe debate në Izrael, pasi prania e tyre mund të ndikojë në funksionimin e fluturimeve civile, veçanërisht gjatë sezonit veror dhe në prag të zgjedhjeve parlamentare.
