Presidenti i SHBA-ve Donald Trump mbajti fjalimin e tij vjetor mes një klime të tensionuar me demokratët dhe votimit në senat për shkarkimin e tij.
Fjalimi u përqëndrua kryesisht në sukseset e arritura gjatë presidencës së Trump. Kreu i Shtëpisë së Bardhë tha se Shtetet e Bashkuara janë më të fuqishme se kurrë.
DONALD TRUMP
PRESIDENT I SHBA
“Tregu i vendeve të punës është rritur, varfëria po ulet, krimi po bie, besimi po rikthehet dhe vendi ynë po lulëzon dhe po gëzon respekt të madh përsëri! Armiqtë e Amerikës janë në arrati, mirëqenia e Amerikës është në rritje dhe e ardhmja e Amerikës është e shkëlqyer. Unë i mbaj premtimet. Vetëm në tre vjet, e kemi asgjësuar mentalitetin se Amerika është në rënie. Po ecim përpara me një ritëm që ishte i paimagjinueshëm vetëm pak kohë më parë dhe nuk do të kthehemi më kurrë pas”
Trump foli edhe për politikat e tij tregtare, duke theksuar marrëveshjen e re me Kinën, e cila sipas tij do t’i sjellë miliarda dollare thesarit të shtetit.
Duke u ndalur tek vrasja e udhëheqësit të Shtetit Islamik Abu Bakar Al-Baghdadi dhe gjenerali iranian Kasem Sulejman presidenti amerikan siguroi se lufta kunder terrorizmit do te ashpersohet.
DONALD TRUMP
PRESIDENT I SHBA
“Mesazhi ynë ndaj terroristëve është i qartë: nuk do t’i shpëtoni kurrë drejtësisë amerikane. Nëse sulmoni qytetarët tanë, e paguani me jetën tuaj”
Por fjalimi I Donald Trump nuk kaloi pa tensione me demokratët për shkak të procesit të shkarkimit te drejtuar nga Kryetarja e Dhomës së Përfaqësuesve Nensi Pelosi.
Në fillim të fjalimit , Trump I dha asaj kopjen e fjalimit, ndërsa kjo e fundit I zgjati dorën por presidenti e shmangu. Me pas Pelosi grisi në sy të të pranishmëve kopjen e fjalimit të Trump, ndërsa ai ishte ende në podium.
Sot senati me shumicë republikane pritet të lirojë nga akuzat për shpërdorim detyre presidentin amerikan. E siç duket, ky është shkaku pse Trump nuk e përmendi fare procesin e shkarkimit gjatë fjalimit të tij vjetor.
