Presidenti i SHBA-së, Donald Trump, shfaqi hapur irritimin e tij ndaj gazetares së CNN, Kaitlan Collins, për këmbënguljen e saj që ta pyeste mbi çështjen Jeffrey Epstein. Përplasja verbale u zhvillua gjatë një deklarate në Zyrën Ovale dhe përfundoi me komente personale nga Trump, i cili e quajti gazetaren “më të keqen” dhe tha se “nuk e ka parë kurrë të buzëqeshë”.
Debati nisi kur Collins vuri në dukje se Trump po përpiqej t’i paraqiste zbulimet e fundit nga dosjet Epstein si të dëmshme vetëm për demokratët, ndërkohë që dokumentet e publikuara tregojnë lidhje të Epstein me dy aleatë të tij, Elon Musk dhe sekretarin e Tregtisë, Howard Lutnick. Trump u përgjigj shkurt se, sipas tij, gjithçka ishte në rregull, përndryshe do të kishte pasur “tituj të mëdhenj” në media.
Gazetarja këmbënguli, duke theksuar se shumë gra që kanë rënë viktima të Epstein janë të pakënaqura me mënyrën se si Departamenti i Drejtësisë ka trajtuar dokumentet e çështjes. Trump tentoi ta mbyllte diskutimin duke thënë se vendi duhet të përqendrohet në çështje të tjera, pasi, sipas tij, nuk ka dalë asgjë inkriminuese për të.
“Çfarë thatë? E dini, ju jeni gazetarja më e keqe. E dini, ajo është një grua e re. Nuk mendoj se ju kam parë ndonjëherë të buzëqeshni. Ju njoh prej dhjetë vjetësh. Nuk mendoj se ju kam parë ndonjëherë një buzëqeshje në fytyrën tuaj. E dini pse nuk po buzëqeshni? Sepse e dini që nuk po thoni të vërtetën”, tha Trump.
.@kaitlancollins is a female version of @Acosta . Amazing that the President of the United States turned on her and CNN right after she brought up The Epstein Files , Musk, Lutnick and survivor concerns (90 seconds) pic.twitter.com/kduktf9k2c
— Jeff Storobinsky (@JeffStorobinsky) February 3, 2026
Kur Collins e pyeti se çfarë do t’u thoshte atyre që ndihen të padrejtësuar, Trump reagoi ashpër, duke e sulmuar personalisht gazetaren dhe duke vënë në dyshim profesionalizmin e saj. Ai u shpreh para ligjvënësve republikanë se CNN është një organizatë “shumë e pandershme” dhe se gazetarja, sipas tij, nuk thotë të vërtetën.
Collins ndërhyri sërish duke sqaruar se pyetjet e saj kishin të bënin me të mbijetuarit e abuzimeve të Epstein, por Trump vazhdoi në të njëjtin ton të ashpër, duke akuzuar median për mungesë integriteti dhe duke thënë se duhet të turpërohen për mënyrën se si trajtojnë çështjen.
/vizionplus.tv
