“Presidenti Donald Trump, stafi i tij apo ndonjë tjetër i lidhur me fushatën, nuk kanë komplotuar me Rusinë për të ndërhyrë në zgjedhjet presidenciale të vitit 2016. Ky është përfundimi i raportit sipas një përmbledhjeje të paraqitur nga Prokurori i Përgjithshëm amerikan, William Barr pasi dokumenti plotë i prokurorit të posaçëm Robert Mueller është dorëzuar në Departamentin e Drejtësisë.
19 avokatë dhe 40 agjentë të FBI-së punuan me prokurorin e posaçëm gjatë hetimit. U lëshuan më shumë se 2.800 thirrje për paraqitje, rreth 500 dëshmitarë u morën në pyetje ndërsa u kryen rreth 500 urdhra për bastisje. Mueller pohoi se hakerat e lidhur me autoritetet ruse kishin qasje në kompjuterë dhe e-maile të demokratëve gjatë fushatës zgjedhore 2016. Prokurori i posaçëm gjithashtu pohoi se ka pasur dy përpjekje kryesore ruse për të ndikuar në zgjedhje.
Në një postim në twitter, presidenti Trump shkroi: “Asnjë bashkëpunim i fshehtë, asnjë pengim i drejtësisë, pafajësi e plotë. Le ta mbajmë Amerikën të Madhe”.
Ndërsa përpara gazetarëve. Trump u shpreh se hetimi ishte një akt i paligjshëm poshtërimi që dështoi.
Megjithatë raporti ngre dyshime dhe nuk është lehtësisht i pranueshëm nga të gjitha palët pasi ka shkaktuar lëkundje në marrëdhëniet politike dhe financiare. Dhoma e Përfaqësuesve votoi njëzëri këtë muaj për një rezolutë e cila kërkonte që raporti i plotë i Mueller të bëhej publik. Zëdhënësi i Kremlinit, Dimitri Peskov ka reaguar duke thënë se Rusia nuk pranon asnjë përfundim nëse nuk publikohet dokumenti i plotë.
