Udhëheqës të 32 shteteve anëtare të Aleancës Veriatlantike kanë marrë pjesë në ditën e dytë të Samitit që mbahet në Hagë.
Fokusi është te një sërë çështjesh të rëndësishme me të cilat përballet Aleanca.
Rritja e investimeve në mbrojtje, një kërkesë e parashtruar nga presidenti amerikan Donald Trump, është tema më e rëndësishme si edhe mbështetja ndaj Ukrainës, e cila po përballet me agresionin rus.
Në një dalje publike së bashku me sekretarin e përgjithshëm të NATO, Mark Rutte, presidenti Trump e vuri theksin pikërisht te rritja me 5% e shpenzimeve të vendeve anëtare.
“Kam vite që po kërkoj të shkojnë në 5%. Dhe tani po shkojnë në 5%, kjo është një rritje e madhe nga 2%, dhe shumë vende as nuk po e përmbushnin atë 2%. Kështu që ky është një lajm shumë i madh”, tha Trump.
Ndërkohë, Rutte, e ka vlerësuar rolin e Trump duke thënë se, pa të kjo nuk do të kishte ndodhur.
“Ne do të vendosim sot të arrijmë në 5%. Kjo është për të garantuar sigurinë tonë dhe për t’u mbrojtur nga kundërshtarët, por edhe për të qenë të barabartë me Shtetet e Bashkuara. Me këtë 5%, evropianët dhe kanadezët do të përputhin shpenzimet e tyre të mbrojtjes me ato të SHBA-ve. Pra, nuk bëhet fjalë që të paguajnë më shumë taksapaguesit amerikanë, por evropianët dhe kanadezët. Kjo nuk do të kishte ndodhur pa presidentin Trump. E them publikisht, edhe nëse disa më kritikojnë, por kur flas privatisht me ta, të gjithë më thonë: ‘Ke të drejtë’”, tha Rutte.
Ndërkohë, i pyetur për përkushtimin e tij ndaj Nenit 5 të NATO-s, i cili garanton mbrojtjen kolektive të anëtarëve, Trump u përgjigj shkurtimisht duke thënë:
“Ne jemi me ta deri në fund.”
Trump foli edhe për armëpushimin mes Iranit dhe Izraelit, te cilin e quajti një fitore të jashtëzakonshme.
“Gjëja e fundit që duhet të bëjë Irani është rifillimi i programit nuklear. Tani ata duan të rimarrin veten. Irani nuk ka për të pasur një bombë bërthamore. Ishte një fitore e jashtëzakonshme për të gjithë, përfshirë edhe Iranin. Izraeli u godit rëndë ditët e fundit. Netanyahu duhet të jetë shumë krenar për veten”, tha Trump.
Presidenti Trump i krahasoi sulmet ndaj centraleve bërthamore të Iranit me bombardimin e Hiroshimës nga SHBA-të, duke thënë se të dyja i dhanë fund me sukses luftërave.
Sakaq ndërsa u pyet për presidentin ukrainas Volodymyr Zelensky ai tha se do të ketë që takim me të për të folur mbi vështirësitë që vendi i tij po kalon.
