Në një postim në Truth Social ditën e sotme (29 maj), presidenti amerikan Donald Trump praktikisht diktoi kushtet e një marrëveshjeje me Iranin.
Ai vuri theksin në hapjen e Ngushticës së Hormuzit dhe së dyti, në çështjet bërthamore.
Trump gjithashtu deklaron se do të takohet me bashkëpunëtorët e tij të ngushtë në Dhomën e Situatave për të marrë vendimin përfundimtar.
Më herët Donald Trump kishte deklaruar se çdo marrëveshje me Iranin do të varet nga arritja e një “marrëveshjeje të mirë” për Shtetet e Bashkuara, ndërsa negociatat mes palëve po intensifikohen dhe tensionet ushtarake në Gjirin Persik mbeten të larta.
“Një marrëveshje që nuk do të ishte në favorin tonë është vija që do të na shtynte të rifillonim armiqësitë”, tha Trump në një intervistë për Fox News, e cila pritet të transmetohet gjatë fundjavës.
Presidenti amerikan theksoi gjithashtu se iranianët “janë negociatorë shumë të mirë”.
Deklaratat e Trump vijnë në një moment kur negociatorët amerikanë dhe iranianë raportohet se kanë arritur një memorandum paraprak 60-ditor, megjithëse marrëveshja ende pret miratimin përfundimtar nga presidenti amerikan.
