Presidenti i shteteve të Bashkuara, Donald Trump i kërkoi Kongresit të votojë buxhetin 5.7 miliardë dollarë për ndërtimin e murit në kufirin me Meksikën.
Trump tha në fjalimin e tij të parë televiziv për këtë vit tha se kishte rritje të krizës humanitare në kufirin me Meksikën. Megjithatë presidenti nuk e shpalli gjendjen e emergjencës kombëtare ashtu siç pritej.
Donald Trump:
Edhe sa gjak amerikan duhet të derdhet përpara se Kongresi të bëjë punën e vet? E vetmja gjë që është e pamoralshme është kur politikanët nuk bëjnë asgjë dhe vazhdojnë të lejojnë që shumë njerëz të pafajshëm të jenë tmerrësisht të viktimizuar. Kjo është një krizë humanitare, një krizë e zemrës dhe e shpirtit.
Por demokratët, të cilët pas zgjedhjeve të nëntorit kanë marrë kontrollin e dhomës së përfaqësuesve, kundërshtojnë me forcë dhënien e fondeve. Ata akuzuan Presidentin se po keqinformon rreth situatës përgjatë kufirit.
Nancy Pelosi: Presidenti ka zgjedhur frikën. Ne duam të fillojë me faktet. Presidenti Trump ka zgjedhur të mbajë peng shërbimet kritike për shëndetin, sigurinë dhe mirëqenien e popullit amerikan dhe të ndalojë pagat e 800,000 punëtorëve të pafajshëm në mbarë vendin.
Ndërkaq udhëheqësi i demokratëve të Senatit, Chuck Schumer, i bëri thirrje presidentit të mundësojë rihapjen e Qeverisë të mbyllur prej 18 ditësh.
Chuck Schumer: Simboli i Shteteve të Bashkuara duhet të jetë Statuja e Lirisë dhe jo një mur i gjatë. Pra, sugjerimi ynë është i thjeshtë. Zoti President: Rihapeni Qeverinë dhe mund të punojmë për të zgjidhur dallimet tona lidhur me sigurinë e kufirit. Por, përfundojeni këtë mbyllje tani.
Megjithëse demokratët dhe republikanët pajtohen se nevojitet më shumë siguri kufitare, kritikët kanë akuzuar presidentin për ekzagjerimi të problemit pasi sipas statistikave numri i kalimeve të paligjshme kufitare është ulur nga 1.6 milionë në vitin 2000 në më pak se 400.000 në 2018.
