Presidenti i Shteteve të Bashkuara, Donald Trump, njoftoi se një forcë e madhe detare amerikane, të cilën ai e përshkroi si “armadë”, po lëviz drejt Iranit, me shpresën se Teherani do të pranojë një marrëveshje “të drejtë dhe të balancuar” për të shmangur armët bërthamore dhe një konflikt të mundshëm.
Në një postim, Trump deklaroi se “armada”, e udhëhequr nga aeroplanmbajtësja USS Abraham Lincoln, po lëviz me “shpejtësi të madhe, fuqi të madhe, entuziazëm dhe vendosmëri”, duke theksuar se bëhet fjalë për një flotë më të madhe se ajo që ishte dërguar më parë drejt Venezuelës.
Presidenti amerikan shprehu shpresën se Irani do të “ulet në tryezën” e negociatave dhe do të arrijë një marrëveshje që ndalon armët bërthamore dhe që do të jetë “e mirë për të gjitha palët”. Ai paralajmëroi se koha po mbaron dhe i bëri thirrje sërish Teheranit të zgjedhë rrugën e marrëveshjes.
“Sulmi i ardhshëm do të jetë shumë më i keq! Mos lejoni që kjo të ndodhë përsëri”, përfundoi Trump në mesazhin e tij.
Reagimi i Teheranit
Irani deklaroi se është i gatshëm për bisedime me Shtetet e Bashkuara, por do të mbrohet nëse provokohet. Mesazhi u përcoll nga misioni diplomatik i Iranit pranë Kombeve të Bashkuara, pas deklaratës së presidentit amerikan.
“Irani është i gatshëm për dialog, të bazuar në respekt të ndërsjellë dhe interesa të përbashkëta. Por nëse ushtrohet presion, do të mbrohet dhe do të përgjigjet si kurrë më parë”, thuhet në deklaratën e postuar nga misioni iranian në platformën X./vizionplus.tv
