Pas shpërthimit me lëndë plasëse të makinës së prokurorit të komanduar pranë KLP-së, Arjan Muça, Drejtori i Policisë së Tiranës, Rebani Jaupi shkoi menjëherë në vendin ku ndodhi ngjarja.
Në një prononcim për mediat, Jaupi tha se lënda plasëse ishte vendosur në pjesën e përparme të mjetit të prokurorit, ndërsa theksoi se nga shpërthimi nuk kanë mbetur persona të lënduar. Ngjarja ndodhi në parkimin e një qendre tregtare pranë “Komunës së Parisit” në Tiranë.
“Aktualisht po kryhen veprimet, mjeti ka dëmtime në pjesën e përparme. Prej një periudjhe 2 vjeçare çdo natë parkohet pranë kësaj qendre. Janë marrë masa nga policia për dokumentimin e kësaj vepre penale. S’ka dëmtime në njerëz dhe as të mjeteve të tjera. Është një shpërthim që ka ndodhur vetëm në pjesën e përparme të makinës. S’ka pasur asnjë person aty afër”, tha ai.
Automjeti përdorej edhe nga bashkëshortja e prokurorit, Gentjana Muça, e cila punon si gjyqtare pranë Gjykatës Administrative Tiranë. Për pasojë, është ende e paqartë nëse ngjarja lidhet me Arjan Muçën apo me të shoqen.
Zona është e rrethuar nga forca të shumta policie.