Fermerët e fshatit Samaticë në Bashkinë e Dimalit prej disa ditësh po përballen me një situatë të vështirë, për shkak të mungesës së tregut për shitjen e produkteve të tyre bujqësore.
Tonelata me domate, kastravec dhe perime të tjera po qëndrojnë stok në pikat e grumbullimit, ku fermerët i çojnë me shpresën mos ndonjë blerës vjen për t’i blerë e në të kundërtën ato qëndrojnë atje deri sa kalben.
Shkak për këtë situatë, sipas vetë fermerëve, është bërë bllokimi i 8 tonë domate me origjinë nga Shqipëria në Kroaci. Ata thonë se pas këtij incidenti, porositë janë ndërprerë pothuajse plotësisht.
“Kemi bërë sera, kemi investuar goxha lekë, kemi bërë mallin sipas standardeve”, tha fermeri Flori Begaj.
Fermerët nuk i mohojnë abuzimet që bëhen nga persona të ndryshëm, duke përdorur pesticide të ndaluara apo duke hedhur më shumë se norma e lejuar.
Institucionet shtetërore, sipas fermerëve, nuk kanë ndërmarrë asnjë masë për të mbrojtur imazhin e bujqësisë shqiptare dhe për të ndihmuar fermerët në gjetjen e tregjeve alternative. Ata kërkojnë urgjentisht ndërhyrjen e Ministrisë së Bujqësisë dhe strukturave përkatëse për të shmangur falimentimin.
/vizionplus.tv
