Në juglindje po shtohet ndjeshëm numri i personave që përballen me probleme të shëndetit mendor, por edhe i përdoruesve të lëndëve narkotike. Sipas specialistëve, vitet e fundit është vënë re një rritje edhe e grave dhe vajzave që përdorin alkool dhe lëndë narkotike, ndërsa mungesa e qendrave rehabilituese afatgjata e bën edhe më të vështirë trajtimin e tyre.
Për specialistët e fushës, problemet sociale janë bërë gjithnjë e më të theksuara për personat me probleme të shëndetit mendor.
“Emigracioni, braktisja nga familjarët dhe mungesa e kujdesit pas daljes nga spitalet psikiatrike janë disa nga sfidat kryesore”, tha mjekja Nikolina Bode.
Bode thekson se dy shtëpitë psikiatrike që funksionojnë aktualisht kanë kapacitete të kufizuara dhe nuk përballojnë nevojat në rritje të kësaj kategorie.
“Ndërkohë, rehabilitimi i përdoruesve të lëndëve narkotike, veçanërisht i grave, mbetet i vështirë për shkak të mungesës së qendrave publike dhe kostove të larta të trajtimit privat”, tha Bode.
Vetëm në juglindje të vendit janë mbi 5 mijë persona që vuajnë nga probleme të shëndetit mendor, ndërsa specialistët kërkojnë më shumë mbështetje institucionale dhe shërbime rehabilituese afatgjata për t’u garantuar trajtim dhe riintegrim në shoqëri.
/vizionplus.tv
