Qarku i Elbasanit po përballet me një fluks të madh automjetesh që përdorin akset për të lëvizur në drejtim të juglindjes apo edhe jugut të vendit.
Nisur nga trafiku i rënduar policia Rrugore ka shtuar asistencën policore në rrugë për të bërë të mundur menaxhimin dhr vijueshmërinë e lëvizjes pa bllokime.
Shefi i qarkullimit rrugor Viktor Dulaj thotë se janë marrë të gjitha masat për menaxhimin e trafikut sidomos në akset që janë vazhdimisht zonë e kuqe siç është Tiranë-Elbasan, Elbasan-Qafë Thanë dhe Tiranë -Rrogozhinë.
“Ne kemi marra masa që në ditët me më shumë ngarkesë pra e premte, e shtunë e dielë, të mos ketë pengesa në qarkullim, pra nmund të ketë ritëm të ngadaltë por jo që të bllokohet trafiku”, tha Viktor Dulaj, shef i qarkullimit rrugor në Elbasan.
Ndryshimet e kodit rrugor duket se ende nuk kanë ndikim tek shoferët në Elbasan pasi vijojnë të kryejnë shkelje të rrezikshme në rrugë.
“Parakalimet janë gjëja më e rrezikshme, prej ketyre ndodhin më shumë aksidente, ndaj ne kemi shtuar kontrollet edhe me radar”, shtoi ai.
Monitorimi 24 ore i akseve rrugore me logjistikë të avancuar ka bërë që edhe ndëshkimet për shkelësit të jenë të konsiderueshme. Vetëm javën e kaluar u ndëshkuan me masa administrative rreth 1800 drejtues mjetesh dhe 3 shoferëve iu hoq leja e drejtimit.
