Shtëpitë e barit janë bërë sërish burim përplasjesh mes grupeve kriminale në Angli.
Andi Alushi 27 vjeç dhe lituanezi 39-vjeçar Valdemaras Kasinskas, anëtarë të një bande, janë dënuar dje nga Gjykata britanike me 19 vite e gjysmë burg për rrëmbim personi dhe torturim në kuadër të grupit të strukturuar kriminal.
Kjo ngjarje e rëndë ka ndodhur në Shefild, ku dy shqiptarë janë torturuar pas dyshimeve se kanë shkatërruar një ambient që përdorej për kultivimin e kanabisit.
Për dhjetë ditë gjatë majit të 2022, këta të fundit janë lidhur me zinxhir në një radiator e janë detyruar të hanë në tasa që përdoren për qentë. Për më tepër viktimat janë poshtëruar duke u detyruar nga shqiptari e lituanezi të kërcejnë teksa torturuesit mbanin në duar hanxharë.
Hetimet nisën pasi lituanezi u mburr në mediat sociale me videot, të cilat më pas u denoncuan në polici.
Hetimet janë bërë nga një skuadër e përbashkët mes SPAK dhe prokurorëve të Britanisë e të Uells-it, të cilat hodhën dritë mbi keqtrajtimin çnjerëzor që u është bërë dy shqiptarëve të cilët janë filmuar.
Në shtator të 2022 disa hetues britanikë mbërritën edhe në vendin tonë për hetime më të thelluara.
