Të shtunën në orën 10:00, Partia Demokratike do të mbledhë forumin e saj më të lartë, Kuvendin Kombëtar. Në bazë të ndryshimeve në statut të miratuara në 11 dhjetor, Kuvendi nuk ka më 7.500 delegatë, por vetëm 1800 prandaj këtë herë punimet e tij do të zhvillohen në ambientet e Pallatit të Kongreseve.
Për herë të parë pas vitesh në Kuvendin e PD rikthehen figura të njohura si Jozefina Topalli e Arben Imami, të cilët do të jenë ndër të parët që do të flasin për demokratët; në Kuvend do të flasë edhe Rudina Hajdari, e cila u përjashtua pasi refuzoi të digjte mandatin e deputetes, por edhe Fatbardh Kadilli, i cili ka marrë pjesë në çdo kuvend, qofte të organizuar nga Sali Berisha, qoftë të organizuar nga Lulzim Basha.
Organizatorët kanë parashikuar 20 fjalime të shtunën në Kuvend, por më i rëndësishmi është ai i liderit historik të PD Sali Berisha, i cili pritet të skicojë rrugën ku do të ecë Partia Demokratike, e cila nga njëra anë prej 7 muajsh është e përçarë, e nga ana tjetër ka humbur çdo betejë elektorale me kundërshtarin prej vitit 2013.
I gjithë Komisioni i Rithemelimit i ka mëshuar idesë se ky është kuvendi që do të tregojë se Partia Demokratike është e bashkuar, por nëse është e qartë se Sali Berisha gëzon mbështetjen e shumicës së demokratëve, ende ai nuk ka shumicën e deputetëve të grupit parlamentar.
Sot të gjithë deputetëve u është shpërndarë ftesa për Kuvendin, përfshirë Lulzim Bashën e Enkelejd Alibeajn dhe janë ftuar të shkojnë në selinë e PD për të marrë mandatin e delegatit.
Por pavarësisht ftesave, dihet tashme se Lulzim Basha, Enkelejd Alibeaj dhe të gjithë deputetët që janë në krahun e tyre nuk do të shkojnë në Kuvend. Deri tani dihet se 15 deputetë që kanë marrë pjesë në mbledhjet e Komisionit të Rithemelimit do të shkojnë në Kuvend, por ende është e paqartë si do të veprojnë deputetet e tjerë si Tomorr Alizoti, i cili ka zgjedhur një pozicion të baraslarguar në debatet e brendshme në PD, apo deputetët që janë bërë pjesë e zgjedhjeve të organizuara nga Komisioni i Rithemelimit.
Por Sali Berisha e bëri një gjest bashkimi duke ndryshuar statutin në mënyrë që të gjithë deputetët të jenë pjesë e Këshillit të ri Kombëtar të PD.
Gjithashtu në listën e kandidatëve për Këshillin Kombëtar vihet re përpjekja e Berishës së pari për të afruar njerëz të rinj në PD dhe e dyta për të rikthyer në parti themelues e figura të njohura të PD. Ndër emrat e rinj bie në sy se kandidat për Këshillin Kombëtar është mjeku i njohur Ilir Alimehmeti apo këngëtari Renis Gjoka.
Ndër figurat që kthehen në PD janë Arben Imami, Arben Ristani, Besnik Aliaj, Rudina Hajdari e Alban Zeneli, të cilët refuzuan të digjnin mandatin e deputetit , aktorja e njohur Rajmonda Bulku, djali i Sokol Olldashit, Glauk Olldashi.
