Një ditë pasi dha “ultimatum” për të liruar hapësirat publike të privatizuara pa të drejtë, kreu i qeverisë, Edi Rama ka publikuar në rrjetin social X disa foto të bizneseve në zonën e “21 Dhjetorit” në Tiranë.
Rama u bën thirrje bizneseve që të heqin nga hapësirat e përbashkëta barrikadat që kanë vendosur për qytetarët, në të kundërt do të përballen me gjoba dhe ndjekje penale.
Lexo edhe :
Related Posts
Rama: Situatë klasike “toke të xanun” në Tiranë, tek 21 Dhjetori – kush nuk do t’i tërheqë vetë nga hapësira publike e përbashkët barrikadat që u ka ngritur njerëzve me gjithëfarësoj objektesh, që nga tavolinat dhe frigoriferët në trotuarë e deri tek muret apo trarët e “doganave” rreth pallateve, do të ballafaqohet jo vetëm me gjobat përkatëse po edhe me ndjekjet përkatëse penale për shkatërrim të pronës publike, cënim të shëndetit e sigurisë fizike së qytetarëve dhe me radhë… Koha për t’u bërë bashkë që të gjithë në emër të bashkëjetesës në të njëjtën lagje; shumica duke marrë mbrapsht atë që i takon dhe pakica duke kthyer mbrapsht atë që nuk i takon!
Ditën e djeshme, kryeministri dha vetëm dy javë kohë për të liruar të gjitha hapësirat e përbashkëta publike të zaptuara pa të drejtë.
“Dua të sqaroj dhe një element tjetër, do i bëj thirrje atyre që kanë keqkuptuar prej vitesh, por kjo është çështje e pushtetit vendor, sensin e pronës së përbashkët dhe të asaj private dhe këtu kam parasysh zhvilluesit e pallateve, që pasi kanë ndërtuar pallatet dhe bashkë me ta edhe ata që kanë lokalet, kanë vazhduar ta trajtojnë pronën përreth si pronë private dhje s’mund të jetë pronë private. Ju bëj thirrje atyre që zotërojnë të tilla asete, që nga trarët që vendosin për tu marrë lekë për parkim banorëve në mënyrën me abuzive duke pretenduar se është prona e tyre private të fillojnë t’i heqin sa më pare”, tha Rama dje gjatë një komunikimi live në Facebook./vizionplus.tv
