Teatri Kombëtar i Operës dhe Baletit ka prezantuar kalendarin për katër muajt në vijim, me një larmishmëri shfaqjesh, duke çelur kështu sezonin artistik.
Koncerti simfonik “Zemërimi i Zotave” ngre siparin e shfaqjeve, të cilat do të pasohen nga një sërë premierash por edhe rivëniesh, për të përcjellë sërish tek publiku muzikën klasike, baletin, ansamblin etj.
ABIGEILA VOSHTINA
DREJTORESHE E TKOB
“Përgjatë këtyre 4 muajve do të sjellim titujt më të bukur të koncerteve simfonike, operave, baleteve nisur me simfoninë “Titan” të Mahler, vijuar me oratorion e Eliasit, baletin Uni, premierën e Ansamblit Popullor “Tumankuqe”, Dance Festival me Harabel Contemporary, muzikalin Callas and Onasis, Arrëthyesin, Atila, Carmen e shumë të tjerë.”
Gjatë sezonit të shkuar sipas drejtoreshës së Teatrit Kombëtar të Operës dhe Baletit, ky institucion ka sjellë në skenë disa nga emrat më të njohur ndërkombëtare.
“Teatri i Operës dhe Baletit ka sjellë për dashamirësit e artit muzikor, 83 vepra të shquara, prej të cilave 36 ishin premiera e 47 ishin rivënie, ndër to 13 shfaqje kanë qenë sold out. Patenta ndërkombëtare i kemi afruar akoma më tepër në TKOB, siç janë artistet me famë ndërkombëtare, të cilët vinë dhe japin kontributin e tyre që tashmë njihen në gjithë botën. Përqafuan teatrin dhe punën tonë, shumë artistë me famë ndërkombëtare siç ishte ardhja e legjendës së dirigjimit Zubin Mehta, masterclass-i i Ermonela Jahos, ardhja e Inva Mulës për Karnavalet e Korçës si dhe masterclass-i nga Anna Pirozzi.”
Artdashësve të operës, nuk do iu duhet të presin shumë gjatë pasi më datë 2 shtator do të kenë mundësi të ndjekin “Zemërimin e zotave” të dirigjuar prej Jacopo Sipari di Pescasseroli, në bashkëpunim me orkestrën simfonike dhe pianistin italian Giuseppe Albanese.
