Zyrtarët më të lartë të Brukseli dhe krerët e Bashkimit Europian pritet të mblidhen këtë të hënë në Tiranë për samitin në kuadër të procesit të Berlinit, samiti i parë prej vitit 2014 që zhvillohet në një prej vendeve të Ballkanit Perëndimor.
Në këtë samit do të marrin pjesë presidenti i Këshillit Evropian Charles Michel, presidentja e Komisionit Evropian Ursula Von Der Leyen, komisioneri i BE-së për Zgjerimin Oliver Verhelyi, ndërkohë që është konfirmuar se në Tiranë do të mbërrijë kancelari i Gjermanisë Olaf Scholtz.
Samiti do të zhvillohet në ambientet e piramidës, një godinë e ndërtuar për të nderuar ish-diktatorin komunist Enver Hoxha, i cili për rreth 5 dekada e izoloi vendin tonë dhe në ditën e ditëlindjes se tij krerët e be së bashku me liderët e vendeve të rajonit do të japin mesazhin se vendi i Shqipërisë dhe fqinjëve tanë është në Bashkimin Evropian.
Samiti do të nisë punimet në orën 11.00 dhe marrëveshja e vetme që do të nënshkruhet është ajo për njohjen e diplomave për disa profesione, ndërkohë që do të inaugurohet edhe Kolegji i Europës.
Procesi i Berlinit u krijua nga ish-kancelaria gjermane Angela Merkel, në vitin 2014 si një mekanizëm për të ndihmuar vendet e Ballkanit perëndimor të integrohen sa më shpejt në Bashkimin Europian e për të forcuar bashkëpunimin rajonal. Por ky samit mbahet në sfondin e tensioneve mes Serbisë e Kosovës të cilat u ashpërsuan pas sulmit terrorist të 24 shtatorit.
Nga Kosova në takim do të jetë kryeministri Albin Kurti, ndërsa nga Serbia do të jetë kryeministrja Ana Bernabiç dhe mbetet për t’u parë a do të ndihet jehona e konfliktit edhe në këtë samit.
Ndërkaq në Tiranë mbërrin edhe kryeministri grek Mitcotaqis, vizita e tij e parë pas tensionimit të marrëdhënieve mes Tiranës e Athinës zyrtare pas arrestimit të kryetarit të bashkisë së zgjedhur të Himarës, Fredi Beleri i cili i përket minoritetit grek.
