Policia e Durrësit ka finalizuar me sukses operacionin policor të koduar “Objektivi”, duke arrestuar autorin e një grabitjeje të dhunshme të ndodhur në lagjen nr. 14, Shkozet.
Ngjarja ndodhi kur një shtetas i identifikuar si E. H., 38 vjeç, banues në Durrës, theu xhamin e një automjeti dhe, duke ushtruar dhunë fizike ndaj drejtuesit të mjetit, i grabiti një çantë që përmbante një shumë të konsiderueshme parash (në euro dhe lekë) si dhe një aparat celular.
Pas hetimeve të shpejta dhe veprimeve të ndjekura nga specialistët për Hetimin e Krimeve të Komisariatit të Policisë Durrës, autori u kap dhe u vu në pranga.
Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Durrës, ku ai do të përballet me akuzat për veprat penale “Vjedhja me dhunë” dhe “Shkatërrimi i pronës”.
Policia e Durrësit thekson se operacionet e këtij lloji do të vijojnë me intensitet, për të garantuar rendin dhe sigurinë e qytetarëve.
/vizionplus.tv
