Policia e Tiranës ka vënë në pranga një 34-vjeçar, i cili akuzohet se ka mashtruar një shtetase duke u prezantuar si agjent imobiliar, ndërkohë që ka thyer masën e sigurisë “arrest në shtëpi” dhe qarkullonte i armatosur.
Operacioni policor i koduar “Implikimi”, i finalizuar nga specialistët e Seksionit për Hetimin e Krimeve Ekonomiko-Financiare në bashkëpunim me Forcën e Posaçme “Shqiponja”, u ndërmorr pas kallëzimit të një qytetareje, e cila kishte dhënë një shumë parash për t’i gjetur një banesë me qira nga një person që u prezantua si agjent imobiliar.
Në pranga u vu shtetasi A. G., 34 vjeç, banues në Tiranë.
Gjatë kontrollit të kryer në automjetin e tij në rrugën “Kastriotët”, policia gjeti dhe sekuestroi: 1 armë sportive (pistoletë), të mbajtur pa leje; ndërsa në banesë u gjet një palë targa automjeti, të cilat nga verifikimet rezultuan të vjedhura.
Hetimet zbuluan se i arrestuari ishte aktualisht me masë sigurie “Arrest në shtëpi”, për veprën penale “Dhuna në familje”, të cilën e kishte shkelur duke lëvizur lirshëm në qytet.
Materialet iu referuan Prokurorisë pranë Gjykatës së Shkallës së Parë Tiranë për veprime të mëtejshme procedurale.
/vizionplus.tv
