Për herë të pestë ka dështuar konstituimi i Kuvendit të Kosovës. Seanca e radhës do të vazhdojë brenda 48 orëve, ditën e premte, ndërsa palët duken të jenë larg një zgjidhjeje.
Ndërkohë, refuzimi i vazhdueshëm i kryeministrit në detyrë dhe liderit të Lëvizjes Vetëvendosje, Albin Kurti, për të folur para mediave ka shkaktuar reagim të ashpër nga gazetarët në Kosovë.
Ata kanë vendosur mikrofonët dhe kamerat e tyre në tokë këtë të mërkurë, në kohën që kryeministri në detyrë, Albin Kurti, po dilte nga ndërtesa e Kuvendit të Kosovës për të shkuar në Qeveri.
Ky veprim i gazetarëve ka ndodhur në shenjë proteste, pasi Kurti nuk ka dhënë asnjë deklaratë për mediat në asnjërën nga 5 mbledhjet e Kuvendit, bën me dije Asociacioni i Gazetarëve në Kosovë.
Eugen Çakolli nga Instituti për Demokraci në Kosovë, në një lidhje të drejtpërdrejtë në edicionin qendror të lajmeve në Vizion Plus me moderatorin Aleksandër Furxhi, tha se LVV-ja nuk ka gatishmëri dhe as vullnet politik për të çuar përpara procesin.
Sipas Çakollit, kjo i jep avantazh të jashtëzakonshëm partive të tjera.
“Fatkeqësisht në Kosovë tani jemi në një lloj krize artificiale, po aq edhe politike. Lëvizja Vetëvendosje, partia që ka fituar zgjedhjet në Kosovë, veçse nuk i ka numrat, nuk ka as gatishmëri e as vullnet politik për ta shtyrë përpara një proces të tillë. Kjo i jep avantazh të jashtëzakonshëm partive të tjera,” tha Çakolli.
