Një ngjarje tronditëse që ndodhi në një klub nate në Maqedoninë e Veriut ka sjellë në mendje shumë njerëz serialin e Netflix, “The Endless Night”.
Ky serial i vitit 2022 trajton tragjedinë e vërtetë të zjarrit masiv që shpërtheu në vitin 2013 në klubin e natës ‘Kiss’ në Santa Maria, Brazil, ku humbën jetën 242 persona, shumica prej të cilëve ishin studentë të rinj nga mosha 18 deri në 30 vjeç. Përveç viktimave, mbi 600 persona pësuan lëndime të rënda. Zjarri shpërtheu pasi një anëtar i grupit ndezi fishekzjarre gjatë një shfaqjeje, duke përhapur flakët në materialin izolues të tavanit.
Seriali, që mbështetet në librin e gazetares Daniela Arbex, “Todo Dia a Mesma Noite”, fokusohet në pasojat e tragjedisë dhe luftën e prindërve dhe familjeve të viktimave për drejtësi, përgjegjësi dhe dënimin e përgjegjësve. Përmes pesë episodeve, shikuesit ndiqnin historitë personale të të mbijetuarve dhe të familjarëve të viktimave, duke zbuluar traumat që ata përjetuan, si dhe përpjekjet e tyre të pandërprera për të zbuluar të vërtetën dhe për të arritur drejtësi.
Seriali pasqyron dështimet e institucioneve, si kontrolli i dobët i kushteve të sigurisë në klub, mungesa e daljeve të përshtatshme emergjente, korrupsioni dhe proceset e ngadalshme gjyqësore që kanë lënë në agoni familjet e viktimave për vite me radhë. Libri i Arbex, i cili ka pasur një ndikim të madh në Brazil, përshkruan jo vetëm tragjedinë, por edhe neglizhencën dhe dështimet që bënë të mundur këtë katastrofë, duke hedhur dritë mbi arsyet që çuan në këtë ngjarje të tmerrshme.
