Drejtori i Përgjithshëm i Policisë së Shtetit, Gledis Nano u shpreh se nuk do të ketë asnjë penalizim për policët që kanë dalë pozitivë në testin e drogës, pa u bindur plotësisht për rezultatin.
Ai shtoi se testi i drogës për efektivët e policisë do të kalojë në disa faza.
“Dua që të informoj dhe të mos ketë asnjë keqkuptim. Policia e Shtetit nuk ka për synim terrorizimin e forcave të policisë, kanë mbështetjen time personale dhe të ligjit për punën që kryen. Testi i drogës do të zhvillohet sipas procedurave të qarta dhe nuk do ndërmarrim asnjë veprim penalizues pa u bindur plotësisht. Nuk ka përfunduar testi i drogës, është në fazat e para. Qëllimi ynë është parandalimi dhe më pas do vazhdojmë me faza të tjera të miratuara nga institucionet shtetërore që do japin aktin përfundimtar për çdo punonjës policie. Duam një polici të pastër dhe kjo bëhet dhe për një arsye tjetër të fortë, për të krijuar besueshmëri në nivel më të lartë në raport me publikun dhe komunitetin. Në përfundim të këtij procesi do ketë informacion zyrtar nga Policia e Shtetit.”
Kreu i operacionit në Guardia di Finanza, Giuseppe Arbore, në konferencën me Policinë e Shtetit për luftën kundër kultivimit të kanabisit, tha se gjatë vitit 2021 është kontrolluar 22.6% e të gjithë territorit shqiptar. Ai bëri me dije se janë identifikuar 1119 plantacione me kanabis si dhe janë asgjësuar 92 mijë bimë si dhe shumë grupe kriminale janë kapur në flagrancë.
