Një teori konspiracioni ka “pushtuar” rrjetet sociale. Përdoruesit e “TikTok” kanë shpërndarë masivisht video duke ndezur topa dëbore, por që në fakt ajo nuk shkrihet. Për këtë arsye, ata pretendojnë se bora është e rreme dhe është dërguar nga Bill Gates.
Një grua, duke ndezur me çakmak një top dëbore, u shpreh: “Kjo shkon për qeverinë tonë dhe Bill Gates. Faleminderit Bill Gates për përpjekjen për të na mashtruar se kjo është borë e vërtetë. Ajo nuk shkrihet. As ujë nuk pikon, asgjë.”
Një tjetër video tjetër tregon një vajzë që mbledh një top dëbore nga lëndina e saj dhe e mban atë mbi një qiri. Ajo vë re se bora nuk shkrihet menjëherë, çka sipas saj, mbështet teorinë e konspiracionit. Përdoruesit e “TikTok” e kanë provuar shkrirjen e borës edhe me tharëse flokësh. Sipas tyre, bora e rreme është dërguar nga Bill Gates për të ushqyer frikën e ndryshimit të klimës.
Ekspertët shpjegojnë se bora reagon kështu për shkak të një procesi të quajtur lartësim, që do të thotë se bora e ngurtë shndërrohet direkt në avuj, pa u shkrirë më parë në ujë të lëngshëm. Kurse shenjat e zeza të djegies, shtojnë ata, vjen nga vetë çakmaku. Moti i rëndë në Teksas, i cili ka qenë i lidhur me ndryshimin e klimës, la miliona njerëz pa energji dhe ujë. Më shumë se 70 njerëz vdiqën, mes të cilëve kishte edhe nga ata që humbën jetën teksa luftonin të ngroheshin.
