Shërbimet e Policisë Kufitare të Portit të Durrësit kanë finalizuar me sukses operacionin policor të koduar “Qelqi”, duke goditur një rast të kontrabandës së mallrave.
Në kuadër të kontrolleve të shtuara në hyrje-dalje të territorit shqiptar, u ndalua për kontroll një kamion që drejtohej nga shtetasi Sh. G., 42 vjeç, banues në Durrës. Gjatë kontrollit, në mjet u gjetën arka me verë dhe shampanjë, të cilat dyshohet se ishin të kontrabanduara dhe nuk ishin të shoqëruara me fatura apo dokumentacion përkatës.
Sipas të dhënave hetimore, 42-vjeçari tentonte të fuste mallrat në territorin shqiptar pa i deklaruar në pikën doganore, në kundërshtim me ligjin.
Si rezultat i operacionit:
- U arrestua në flagrancë drejtuesi i mjetit,
- U sekuestruan kamioni, sasia e verës dhe shampanjës, si dhe pasaporta dhe celulari i të arrestuarit, në cilësinë e provave materiale.
Materialet hetimore i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për vijimin e procedurave ligjore.
/vizionplus.tv
