Rritja e tensioneve mes Shteteve të Bashkuara dhe Iranit ka tronditur sërish tregjet ndërkombëtare, duke çuar në rritje të çmimeve të naftës dhe duke shtuar shqetësimet për furnizimet globale të energjisë.
Çmimet e naftës u rritën me më shumë se 2% gjatë ditës, pasi Shtetet e Bashkuara njoftuan se kishin goditur disa raketahedhës iranianë në ishullin Larak, pranë ngushticës së Hormuzit.
Ky ishte sulmi i parë amerikan ndaj Iranit pas rreth një muaji. Teherani u kundërpërgjigj duke goditur objektiva ushtarake amerikane në Jordani.
Për tregjet ndërkombëtare, shqetësimi kryesor lidhet me ngushticën e Hormuzit, një nga rrugët më të rëndësishme të transportit të energjisë në botë. Përmes saj kalon rreth një e pesta e naftës dhe gazit global.
Çdo përshkallëzim i konfliktit mund të vështirësojë transportin dhe të shkaktojë probleme të reja me furnizimin, duke ushtruar presion të mëtejshëm mbi çmimet e energjisë.
PRESION MBI REZERVËN FEDERALE
Rritja e çmimeve të energjisë vjen në një moment delikat edhe për ekonominë amerikane. Inflacioni në Shtetet e Bashkuara mbetet mbi objektivin prej 2% të Rezervës Federale.
Në takimin vjetor të bankierëve qendrorë në Jackson Hole, zyrtari i Rezervës Federale, Kevin Warsh, paralajmëroi se inflacioni vazhdon të jetë shqetësues dhe se kushtet financiare nuk janë ende mjaftueshëm kufizuese.
Komentet e tij kanë shtuar spekulimet se politika monetare amerikane mund të bëhet më e ashpër.
Tregjet financiare reaguan menjëherë. Indekset kryesore në Wall Street u mbyllën në rënie, ndërsa yield-et e bonove afatshkurtra amerikane u rritën dhe dollari fitoi terren. Në të kundërt, çmimi i arit pësoi rënie.
Të njëjtën tendencë ndoqën edhe tregjet aziatike. Aksionet në Tokio, Seul, Hong Kong, Shangai, Taipei dhe Xhakartë ranë, ndërsa kompanitë e teknologjisë u përballën me presion më të madh.
Investitorët tashmë presin të dhënat e reja për ekonominë amerikane. Shifrat e punësimit priten këtë javë, ndërsa të dhënat e reja për inflacionin priten javën e ardhshme.
Këto raporte pritet të jenë vendimtare për të kuptuar nëse Rezerva Federale do të ndryshojë qëndrimin e saj për normat e interesit.
Ndërkohë, tregu i naftës mbetet veçanërisht i ndjeshëm ndaj zhvillimeve në Lindjen e Mesme. Përmirësimi i qarkullimit përmes ngushticës së Hormuzit nuk ka eliminuar rrezikun, ndërsa çdo përshkallëzim i ri mes SHBA-së dhe Iranit mund të sjellë goditje të mëtejshme për furnizimet globale dhe çmimet e energjisë.
