Vit i ri, por politikë e vjetër. Kështu ka qenë edhe nisja e sesionit të ri parlamentar këtë të hënë, ku tensionet mes mazhorancës dhe opozitës nuk kanë munguar.
Deputetët e opozitës bllokuan foltoren e Kuvendit, ndërkohë që kreu i grupit parlamentar socialist, Taulant Balla, në fjalën e tij nga vendi ironizoi opozitën rreth deklaratave të bëra në media dhe rrjetet sociale pas ftesës së presidentit të SHBA-së, Donald Trump, për kreun e qeverisë shqiptare, Edi Rama, për t’u bërë pjesë e Bordit të Paqes.
Balla, në fjalën e tij, tha se armata e qyqarëve dhe e bufit nuk e përballoi dot as këtë lajm të mirë për vendin, duke dalë e hedhur baltë në media.
“Edhe pse është një vit i ri, shohim prapë zakonin e vjetër, me shpresën që koha do ju bëjë të reflektoni. Kuvendi i Shqipërisë mblidhet në një moment krenarie në arenën ndërkombëtare për Shqipërinë, e cila sapo është ftuar të marrë një tjetër rol të paimagjinueshëm, sikurse është ftesa e presidentit Donald Trump, i cili e ka ftuar personalisht kryeministrin Rama dhe, përmes tij, Shqipërinë, t’i bashkohet një organizmi të ri ndërkombëtar të quajtur Bordi i Paqes. Do ta vlerësoja maksimalisht që edhe PD ta vlerësojë këtë moment të rëndësishëm për Shqipërinë. Fatkeqësisht, edhe për ngjarje të tilla me peshë të madhe për Shqipërinë tonë të vogël, edhe ndaj këtij lajmi të madh për Shqipërinë, për emrin e Shqipërisë dhe shqiptarëve, u ngrit sërish armata e qyqarëve. Që nga e shtuna në darkë bërtisnin e thërrisnin: në fillim thanë që nuk ka ftesë, pastaj kur doli ftesa thanë që janë të gjitha vendet anëtare të OKB-së; pastaj më e bukura ishte se ftesa është e njëjtë edhe për presidentin e Argjentinës, edhe për atë të Paraguajit. Më pas thanë se ftesa duhet të jetë e personalizuar dhe edhe aty gabuan. Nuk është fare rastësi që nuk janë asnjëri prej kryeministrave apo presidentëve të tjerë të Ballkanit Perëndimor, sikurse është edhe kryeministri Micotakis apo presidenti Erdogan. Pastaj, me porosi të bufit, filluan të dalin në televizione, aq sa edhe ‘Trumpisti’ Tritan Shehu doli në TV-në e Zenit dhe na shau SHBA-të. Sa i përket kësaj çështjeje, nuk jemi aty sepse jemi vend anëtar i NATO-s, por sepse Rama është partner i besueshëm i SHBA-ve”, deklaroi Balla.
