Të hënën e 1 shkurtit, me një ceremoni solemne virtuale, do të firmoset formalizimi i marrëdhënieve diplomatike mes Republikës së Kosovës dhe Shtetit të Izraelit.
Ministrja e Jashtme dhe e Diasporës, Meliza Haradinaj-Stublla, deklaroi se vendi po hyn në një etapë të re historike ku shtetësia dhe subjektiviteti ndërkombëtar i Kosovës po konsolidohet fuqishëm.
MELIZA HARADINAJ-STUBLLA
MINISTRE E JASHTME DHE E DIASPORËS, KOSOVE
“Ky moment tejet i rëndësishëm për ne, është përjetësim i miqësisë së gjatë, mes popujve tanë, që tani po kurorëzohet me lidhjen e marrëdhënieve diplomatike. Kosova është përjetësisht mirënjohëse ndaj Shteteve të Bashkuara të Amerikës.”
Më 4 shtator të vitit 2020, Kosova dhe Serbia nënshkruan në Shtëpinë e Bardhë, dy dokumente për normalizimin e raporteve ekonomike, në prezencë të ish-presidentit amerikan, Donald Trump. Ato u ndërmjetësuan nga i dërguari i atëhershëm për dialogun mes dy vendeve, Richard Grenell.
Me marrëveshjen e firmosur në Uashington, Kosova është zotuar se do të vendosë marrëdhënie diplomatike me Izraelin dhe se do të hapë misionin e saj diplomatik në Jeruzalem, ndërsa Serbia ka premtuar se do ta zhvendosë ambasadën ekzistuese në Izrael nga Tel Avivi në Jeruzalem.