Subscribe

Kamerat e sigurisë dhe numri i shasisë së mjetit që u përdor në vrasjen e Briken Sanajt, kanë ndihmuar policinë në zbardhjen e plotë të ngjarjes dhe identifikimin e autorit.

 

Burimet bënë të ditur se dy shtetasit kosovarë, Kened Antoni dhe Gjelosh Krasniqi, të shpallur në kërkim, dyshohet të jenë vrasës me pagesë në vendin tonë dhe në Kosovë.

 

Ata i kanë shitur Vladimir Kolës një mjet tip Benz në 24 tetor, 6 ditë para se të kryhej vrasja.

 

Bashkë me ta besohet se ka qenë edhe një tjetër kosovar, i cili është në kërkim. Shitja e makinës është bërë në një lokal në Shëngjin dhe takimi i tyre është fiksuar nga kamerat e sigurisë.

 

Pas shitjes së mjetit, autorët i kanë vendosur targa të vjedhura.

 

Vladimir Kola ka ndjekur të gjitha lëvizjet e viktimës, i cili pak orë para se të ekzekutohej, ishte në Shëngjin tek dasma e shokut të tij.

 

Hetuesit kanë dyshime të forta se një person i njohur i viktimës, i cili ka qenë në dasmë, gjithashtu mund të ketë informuar autorin e krimit.

 

Ky i fundit ka pritur rreth 2 orë i fshehur pas një peme në kompleksin te Kodra e Diellit, deri sa Briken Sanaj të vinte e të parkonte mjetin.

 

Vladimir Kola ka hyrë në Shqipëri ilegalisht nga Mali i Zi dhe në të njëjtën mënyrë më pas është arratisur drejt Belgjikës ku edhe fshihet.

 

Sa i takon vëllait tjetër, Agustin Kola, i cili gjithashtu është shpallur në kërkim nga policia, dyshohet se ka patur rol si nxitës i krimit.

 

Vrasja ndodhi për shkak të një konflikti të para 10 viteve mes dy familjeve. Sipas hetimeve, Agustin Kola ndodhet në Spanjë.

Leave a Reply

Your email address will not be published. Required fields are marked *