Arbër Çekaj, Fatmir Pjetri dhe Lulzim Çepele kanë dalë paraditen e kësaj të mërkure përpara gjykatës për t’u njohur me masën e sigurisë, pas tentativës së tyre të dështuar për t’u arratisur nga burgu.
Të qetë dhe të qeshur, ata janë shfaqur në gjykatë; madje të dënuarit kanë shkëmbyer batuta me njeri-tjetrin apo me mediat. Çepele është paraqitur me dorën e fashuar pas prerjes së damarëve ditën e tentativës për arratisje.
Prokuroria kërkon t’i caktohet masa shtesë arresti në kuadër të procedimit tentativë arratisje e goditje për shkak të detyrës.
Mbi të tre rëndojnë akuza të tjera veç dënimeve që vuajnë tashmë. Arbër Çekaj është dënuar me 14 vite për trafik droge dhe grup kriminal pasi iu kapën 613 kg kokainë, Fatmir Pjetri për grabitje me armë e dhunë në grupin e babagjyshëve dhe Çepele i dënuar për shfrytëzim prostitucioni.
Ky i fundit ditën e arratisjes ka prerë damarët duke tërhequr vëmendjen e rojëve. Në këto momentet Çekaj dhe Pjetri kanë tentuar të arratisen me litar dhe çengelë, mjete që kishin arritur ti siguronin më përpara pa u kapur nga rojet. Dyshohet se pikërisht në këtë plan janë të përfshirë edhe zyrtarë të Drejtorisë së Burgjeve.
Ata janë kapur nga roja pak metra përpara se të arratiseshin. Madje ata kanë goditur edhe dy gardianë të cilët u përplasen në afërsi të daljes.
Kamerat e sigurisë brenda burgut kanë filmur të gjithë skenën, ku kanë nisur edhe hetimet sesi të burgsurit dolën në dhomën e ajrosjes dhe nuk u kontrolluan nga askush.
Ndërkohë pas tentarivës për t’u arratisur, tre të burgosurit janë izoluar dhe nuk do të kenë mundësi komunikimi as me familjarët.
