Shtatë efektivë policie, të akuzuar një vit më parë për mos-asgjësimin e rreth 1 mijë bimëve kanabis sativa në Njësinë e Shalës në Dukagjin, kanë mundur të marrin pafajësinë nga Gjykata e Shkodrës.
Policët Gjergi Mala, Sokol Kroni, Faik Latifi, Nik Shkambi, Zef Doçi, Ardian Baçina dhe Kristian Lokthi, ishin në akuzë për shpërdorim detyre dhe të pezulluar nga detyra, por pas hetimeve të Prokurorisë Shkodër për rreth 1 vit, organi i akuzës doli në përfundimin se nuk vërtetohet vepra penale dhe implikimi i policëve.
Në këto kushte prokurorja Besmira Vishe iu drejtua gjykatës për pushimin e çështjes. Gjyqtarja Tefte Xhanari pranoi kërkesën, duke pushuar përfundimisht çështjen. Më herët, me vendim të Gjykatës së Apelit u hoq pezullimi nga detyra për të gjithë policët.
Mes tyre ishte edhe Zef Doçi, zv/shef seksioni në njësinë elitë RENEA, por në kohën që dyshohej të jetë kryer vepra penale, mbante detyrën e shefit të stacionit policor të Thethit.
Në nëntor 2024, AMP pretendonte se policët nuk kanë asgjësuar rreth 1000 bimë narkotike, të cilat u gjetën në proces tharje gjatë një operacioni të zhvilluar në korrik 2024, pavarësisht se janë konstatuar nga ana e tyre gjatë kontrollit.
Megjithatë, nga provat e mbledhura, pretendimi i AMP-së nuk u konfirmua gjatë hetimit. Në nëntor 2024, efektivët u pezulluan nga detyra dhe po hetoheshin në gjendje të lirë.
