Disa vende e kanë njohur zyrtarisht shtetësinë palestineze gjatë dy ditëve të fundit, ndërsa Izraeli vazhdon sulmin e tij në Qytetin e Gazës.
Tanke dhe automjete të blinduara janë parë në qytet, dikur shtëpi e qindra mijëra njerëzve, ku ushtria izraelite ka shkatërruar blloqe të mëdha banesash dhe i ka detyruar banorët të braktisin shtëpitë e tyre.
Bombardimi vazhdon ndërsa Presidenti i SHBA-së, Donald Trump, përgatitet të mbajë një fjalim në Asamblenë e Përgjithshme të OKB-së në Nju Jork gjatë ditës së sotme, ku liderët botërorë janë mbledhur për takimin e 80-të vjetorit të organizatës.
Trump nuk mori pjesë në një konferencë para Asamblesë ku u fol mbi një zgjidhje me dy shtete për konfliktin Izrael-Gaza.
Franca, e cila bashkë-organizoi eventin me Arabinë Saudite, njohu zyrtarisht shtetin palestinez në këtë event, pas njoftimeve nga Mbretëria e Bashkuar, Kanadaja dhe Australia të dielën.
SHBA-të e kanë kritikuar këtë veprim si të padobishëm për t’i dhënë fund konfliktit, dhe kryeministri izraelit Benjamin Netanyahu ka thënë se “nuk do të ketë shtet palestinez”.
Trump pritet të takohet me udhëheqës nga Lindja e Mesme në një takim të veçantë në OKB pas fjalimit të tij, i cili pritet të mbahet në orën 09:50 sipas kohës lokale./vizionplus.tv
