Kryeministri Rama është takuar këtë të martë me kryeministrin e Greqisë Kyriakos Miitsotakis.
Në takimin mes dy liderëve, sipas zyrës së shtypit të Kryeministrisë, është diskutuar për të gjitha çështjet e përbashkëta përfshirë këtu dhe atë t integrimit të Shqipërisë, ku Rama u zotua se Shqipëria do të vijojë që të përmbushë të gjitha reformat.
Në të njëjtën kohë Rama ka theksuar gjatë takimit se është në interes të të dyja palëve që të diskutohen të gjitha çështjet me interes, duke lënë këtu të nënkuptuar edhe atë të detit, me qëllim që të forcohet bashkëpunimi mes palëve.
Nga ana tjetër kryeministri grek, mirëpriti angazhimet e palës shqiptare ndërsa u zotua se marrëveshja bilaterale për njohjen e ndërsjelltë të patentave do të kalojë së shpejti për miratim në parlamentin grek. Ai shprehu gjithashtu mbështetje për Shqipërinë edhe për negociatat.
Njoftimi i Kryeministrisë
Kryeministri Edi Rama është pritur në një takim me frymë pozitive nga Kryeministri i Greqisë Kyriakos Mitsotakis.
Në këtë takim u diskutuan të gjitha çështjet e përbashkëta. Kryeministri i Shqipërisë theksoi se pavarësisht vendimit të Këshillit të BE-së, Shqipëria do të vazhdojë zbatimin e reformave me të njëjtën vendosmëri.
Në të njëjtën kohë është në interesin e Shqipërisë po aq sa është në interesin e Greqisë fqinje, theksoi Rama, të diskutohen të gjitha çështjet me interes të përbashkët dhe të forcohet bashkëpunimi mes të dyja palëve.
Kyriakos Mitsotakis theksoi se Greqia mbështet prespektivën europiane të vendeve të Ballkanit Perëndimor, për sa kohë këto vende përmbushën të gjitha kërkesat për anëtarësim.
Më tej, ai mirëpriti angazhimin e palës shqiptare për të vazhduar punën me çështjet e pronave dhe të vetëdeklarimit/censusit, të cilat janë shqetësime për minoritetin grek në Shqipëri.
Veç kësaj, Kryeministri grek theksoi se marrëveshja bilaterale për njohjen e ndërsjelltë të patentave do të kalojë së shpejti për miratim në parlamentin grek.
Kryeministri i Shqipërisë ftoi Kryeministrin e Greqisë për të vizituar Shqipërinë në të ardhmen e afërt, ftesë të cilën ai e pranoi.
