Ish-deputetja e Partisë Demokratike, Jorida Tabaku u takua me një grup nënash pensioniste, të cilave iu dhuroi lule ne këtë 8 Mars.
Teksa vlerësoi sakrificën e zonjave përgjatë gjithë jetës së tyre, Tabaku iu tha se PD ka hartuar programin që sipas saj do ta çojë dinjitetin e tyre në vend, nëpërmjet rritjes së pensioneve.
Ajo shpjegoi se sistemi shëndetësor do të vendoset në qendër të vëmendjes së qeverisë së Partisë Demokratike.
“Do të jetë një qeveri normale që do të punojë për vendin dhe qytetarët. Nuk ia arrijmë dot të gjitha, duhet të jemi realë, por ato që marrim përsipër t’i bëjmë duhet patjetër t’i ofrojmë. Pandemia na tregoi se shëndeti duhet të jetë i pari. Duhet të investojmë tek shëndetësia dhe për moshën e tretë duhet të ndryshojë sistemi shëndetësor”, tha Tabaku.
Tabaku nënvizoi mes të tjerash se Shqiëpria ka nevojë për investime në arsim, në shëndetësi dhe me paga të larta.
“Ka njerëz që thonë se s’ka për t’u zgjidhur ndonjëherë sepse ka hyrë e keqja shumë keq. Ju jeni shumica, ata janë pakica, dhe nëse japim shëmbuj të mirë ne mund ta zgjidhim”, shtoi Tabaku.
